28歲宅男阿勇是家中長子,平日嗜好只有打機,中五畢業後,任職保安,月入萬三。阿勇指返工地點好少女仔,從未試過拍拖滋味。直至2016年7月28日,阿勇透過交友app認識了96年出世嘅美容師 Coco。

阿勇為了接近佢、討好佢,前後畀咗近4萬元幫佢買咗20個美容療程(雪肌采美容纖體中心)。阿勇話當日係佢人生第一次踏入美容院,Coco 親手幫他做facial及針清,「有身體接觸嘛,話晒有個女仔幫我清潔嘛… 都有啲感覺。」之後阿勇得到 Coco 表弟潘杰的「幫助」,到11月終於鼓起勇氣「表白成功」,正式同Coco「拍拖」。

阿勇同 Coco 「拍拖」近兩年,唔好話親咀,手仔都未拖過、連搭膊頭行街也未試過。拍拖最大嘅身體接觸,就係喺美容院 Coco 幫佢做 facial 嗰陣時。阿勇解釋: 「Coco係好保守嗰啲女仔,即係依家都未拖到手,佢話呢啲係做咗老公先會做嘅嘢

阿勇都係正常男人,拍拖當然希望可以親密一啲… 阿勇曾嘗試表達不滿,卻反被 Coco 責罵:「我就知你係同嗰啲只係要女人肉體嘅衰人無分別!」

其實阿勇同Coco至今一年零八個月的「拍拖」生活中,絕大部分時間,只是透過WhatsApp交流,見面不超過十次,而且每次例必帶同表弟潘杰三人行,正式拍拖後反而未試過單獨約會。

潘杰又跟阿勇做」兄弟」,不但教佢追求 Coco,就連表白當日也在現場教路。阿杰教路表白前先給予「誠意金」,又指無故轉帳予 Coco 可製造驚喜,阿勇言聽計從,入咗「誠意金」 13,888元予 Coco 寓意「一生發發發」。潘杰同 Coco 又不時一唱一和令阿勇送禮送錢,不單網上購物、連女方箍牙費,阿勇都準時「科水」。

而 Coco 一直當阿勇「提款機」,除了一開始買咗4萬元美容療程、每個月找萬幾蚊卡數、買禮物外,阿勇又曾因激嬲女朋友,要付12萬元箍煲費上個月又申請了一張個人信用卡交給 Coco 使用,希望 Coco 可以做佢老婆。

阿勇坦言「未識佢之前戶口咪有30萬囉!依家我每個月都俾成萬幾蚊佢,成份糧俾佢,一年十幾萬嘛,即係廿萬,可能俾咗50萬俾佢囉…… 都覺得肉赤,自己啲錢嚟,咁辛苦搵返嚟。」阿勇又表示現時只剩不足1萬元積蓄。

最慘嘅係… 《蘋果》記者跟蹤他們的3人約會,發現Coco趁阿勇離開後,即與表弟十指緊扣又攬腰,表現親暱,又出入表弟住宅單位,關係根本就係一對情侶。

《蘋果》記者連日跟蹤,上周二(10日)Coco又帶表弟阿杰參與約會。當日3人在旺角食燒肉放題,入座卡位時,Coco 離奇地不是坐在男友阿勇身旁,反而與表弟鄰坐,期間阿勇一直含情脈脈看著女友,但Coco 只顧眼前美食,鯨吞30個泡芙,反而是表弟較常與阿勇閒談,表弟更不時指揮阿勇替他們斟茶遞水,毫不似一個情侶約會,約一小時後由阿勇埋單就一同離去。

步出餐廳後,Coco 多與阿勇前後腳步行,即使阿勇在扶手電梯故意站在 Coco 身旁,Coco 亦翹起雙手,木無表情,表弟阿杰則跟在後面。《蘋果》記者尾隨3人離去,竟目睹阿杰從後偷偷輕拍 Coco 臀部數下,然後偷笑;3人在港鐵車箱,亦是 Coco 與阿杰對望,阿杰更扮鬼臉逗「表姐」一笑,站在旁邊的阿勇儼如才是這場約會的電燈膽。

列車駛至深水埗時,Coco 和 阿杰先下車,甫遠離阿勇的視線範圍後,Coco 即與阿杰越走越近,更突然主動手拖阿杰,二人十指緊扣,在扶手電梯更情不自禁輕吻一下,旁若無人,超出一般表親關係。二人隨後到鴨寮街買電話卡後再閒逛一會就乘坐巴士返回屯門一個私人屋苑單位。

根據土地註冊資料,該單位由一名姓石的女子持有,石女士同時是 Coco 之前介紹阿勇去做美容療程的美容店老闆娘。據阿勇所講,石女士跟阿杰是母子關係,阿杰不時到美容店幫手。

一直未「醒」的阿勇直至受訪尾聲才承認,其實對女友「有七成懷疑,三成保留。」更指若得知 Coco 有外遇,會報警稱被騙財。其實阿勇家人對於他陷入這段不能拖手卻不斷付錢的戀情,感到十分擔憂及憤怒,在無可奈何之下,疑有人向《蘋果日報》爆料才揭發出整個騙局。

 

Source:
蘋果日報