鄭中基《One More Time》演唱會昨晚 (6/2) 繼續在紅館開騷,嘉賓就找來當年曾一齊主持《美女廚房》嘅梁漢文和方力申,Ronald 問大家係咪十年無睇《美女廚房》?,梁漢文即話:「人哋最近有做。」方力申回應:「嗰個係假㗎。」台下觀眾即刻大笑。鄭中基繼續串:「乜有新嘅一輯咩?」

鄭中基再問觀眾:「想唔想我哋再做一輯嘅先 ?」台下觀眾即刻嗌想… 之後鄭中基提議新一輯叫《美男廚房》。方力申即係話:「你哋變咗啦!」鄭中基就拍住梁漢文,孤立了方力申話:「因為我哋已經有家室,唔可以亂咁食嘢。」方力申即話:「上晒岸升晒呢,得我Single,想當年我唔係Single,嗰陣我就安分守己,今日就要食自己。」鄭中基回應:「你想快啲媾到女就去投胎啦。」

三人贊成拍《美男廚房》後,方力申就話:「等我聽日返去TVB傾傾先。」鄭中基就捉住方力申:「唔一定要TVB嘅,而家有ViuTV㗎嘛!」梁漢文就稱新一年要有大志,不如索性直接搞電視台:「個台名我都諗埋㗎喇,就叫做T Viu B!」然後鄭中基就話要集資搞電視台,於是即起歌唱《財神到》,到觀眾席逗利是集資!

影片: