最近有兩單新聞,都係講不孝子偷屋企人錢做投資,但結果分别都幾大 …

2015年1月,21歲嘅卜耀棠認識咗倫敦金美女經紀 Yannes,Yannes 遊說卜耀棠投資倫敦金。但做兼職侍應及救生員嘅卜耀棠收入有限丶積蓄不多,唔夠錢投資,於是 Yannes 就介紹咗財務中介 Alson 畀佢認識。Alson 教佢點樣申請巨額貸款,結果 … 卜耀棠竟然訛稱獲父母授權,盜用父母身份證影副本,將父母名下嘅荃灣麗城花園住宅物業抵押予財務公司,從而獲得250萬港元貸款。

但扣除律師費及雜費丶卜耀棠實收只有208.7萬元,之後仲畀咗 165.4萬 Alson 做中介費,又再借 5.7萬畀 Alson,最後先畀 23萬 Yannes 去投資倫敦金 … 而餘下嘅 14.6萬竟然喺幾個月內洗晒 …

同年11月,卜耀棠父母收到財務公司催促還款欠單,連本帶利息總共欠二百六十多萬元 !!! 卜耀棠父母收到催款欠單後大驚報警,呃貸款事件先被揭發。2016年警方正式拘捕卜耀棠,佢喺2019年2月12日在庭上承認一項詐騙罪,還押至2019年3月5日判刑。

再睇另一單英國新聞…

英國創業家 Andrew Michael 近日在《BBC》訪問中透露,早喺1997年,佢17歲時已經意識到網路託管 (Web Hosting) 嘅商機… 當年網路不普及,網路託管公司多專注喺大型企業上,忽略咗中小企業同個人市場,於是佢想同朋友夾份開間專做中小企嘅網路託管公司。

但17歲嘅佢仲係中學生,根本就無錢創業… 佢為咗創業竟然把心一橫,盜用阿媽張信用卡,拎咗3萬英鎊(約30萬港元) 去同朋友建立網路託管公司 Fasthosts。佢喺《BBC》訪問中話: 「此舉其實相當冒險,要是無法支付月底的信用卡帳單,不僅一切玩完,還要面對媽媽的滔天怒火,所幸過了一個月後,已經有足夠的客戶與資金找卡數。」之後佢先再同阿媽解釋,阿媽亦原諒咗佢。

Andrew Michael 為咗可以專心搞好自己間 Fasthosts ,最終放棄升讀大學 … 九年之後,佢以6,150萬英鎊(約6.2億港元)將 Fasthosts 轉手,佢當時持有75% 公司股份,即係話26歲就賺咗 4,600 萬英鎊(約4.7億港元)成為億萬富豪!

到28歲,Andrew Michael 又成立另一家雲端存儲公司名為 Livedrive,後來轉手又赚一大筆,雖然金額無公開,但佢精準嘅 IT 投資眼光及經營手法,已令佢喺商界聲名大噪,並成為英國知名創業家。

Loading...