去年持單程證來港的女侍應,今年初因其10歲兒子耳痛,帶他到廣華醫院急症室求診,惟有感兒子遲遲未獲治理,她直衝治療室與一名當值女護士理論,要求「打尖」,其間用袋襲擊女護士頭部及頸部,令對方受傷。案件今在九龍城法院再訊,女侍應承認普通襲擊罪。辯方律師請求以罰款了事,惟主任裁判官吳蕙芳拒絕,斥責被告:「去救人嘅地方撒賴?添煩添亂?我一定唔會放過,呢個訊息要傳出去!」下令先索取被告的社會服務令報告,押至6月11日判刑,其間被告繼續獲准保釋。

其實吳官過往在審理案件時,經常妙語連珠,不時痛斥及教誨被告,獲不少網民大讚「呢啲官先至夠貼地」。

現在就同大家重温一下吳蕙芳審案時嘅金句:

1. 新移民婦涉急症室打女護: (今日)

吳蕙芳斥:「刁民搞搞震」

主任裁判官吳蕙芳指被告涉嫌襲擊護士,直言本案比一般襲擊案嚴重,在醫院發生暴力事件非常嚴重,「人哋已經忙到一頭煙,仲要遇到刁民搞搞震!」吳官及後用普通話直接訓斥被告,說:「你還要在一個孩子面前打人,誰教你的?」被告聞言落淚,吳官見狀即謂:「你還要在我法庭哭呀?來我法庭沒有同情分,眼淚是沒有同情分的。」
「去救人嘅地方撒賴?添煩添亂?我一定唔會放過,呢個訊息要傳出去!」


2. 阿伯偷運水貨奶粉案:

吳蕙芳斥:「自己國家製造的奶粉,連自己都唔敢食,係咪可悲?這情況是國恥!」

「老當益壯 ,運咁多奶粉,一定都可以承受牢獄之苦。」
「我希望長者唔好恃老賣老,(走私奶粉)真係會判監,千祈唔好以身試法!」
「希望犯罪集團積陰德,唔好咁冇陰公送老人家坐監。」


3. 青年非禮女途人 :

吳蕙芳表示明白被告智障,「但唔係大晒」,批評他非禮女性,並且教訓他一餐:「人哋可唔可以見到邊個樣衰就揼邊個呀?人哋覺得睇你唔順眼,可唔可以揼你呀?唔得呀嘛!」

直言被告「根本係色情狂」,批評他不工作,「游手好閒,咪胡思亂想諗吓點摸女人囉」,着他想想「人哋可唔可以摸你阿媽、家姐細妹呀?」


4. 法律畢業生打女友:

吳蕙芳斥:「讀咁多書廢嘅」

聆訊本以英語進行,主任裁判官吳蕙芳特意轉用廣東話訓斥被告:「酒品咁衰,以後唔准飲酒!唔好以為你可以借酒行兇,可以發酒癲。醉酒都有三分醒,你識行、識嬲,你話你斷片,我唔信。」
吳官又批評被告的學歷與行為不成正比,「你讀咁多書,廢嘅!格衰,讀幾多書都冇用」


5. 疏忽照顧兒童案:

吳蕙芳斥:「個女人自己唔識睇醫生?嗰三個係你親生仔女,你反而唔照顧,去照顧成年女人?你以為100蚊就夠3個人食?」

單親爸北上會大陸發燒女友 放下$100獨留3子女在家
辯方代表律師指,被告翌日曾與大女兒聯絡,試找朋友借錢,裁判官即反駁指:「細路仔邊有通財之義嘅朋友?大人都未必有啦。」


6. 召妓失勞力士怕老婆知 報假案扮遇劫案:

吳蕙芳話:「阿伯曳喇你」

老伯在警誡下招認報假案,「我隱瞞事實,係唔想老婆知我去叫雞,所以先作個古仔話俾人打劫」。 老伯的太太和女兒昨到庭支持。主任裁判官吳蕙芳判刑時指「阿伯曳喇你」、「唔想老婆知,𠵱家乜都知晒」、「你自己都覺得醜」,老伯聽得害羞低頭。吳官又指「老公嫖妓對所有老婆都係好傷心嘅一件事」,老伯、太太和女兒聽到後相繼流淚。

老伯哭着請求輕判,吳官問他:「咁你會唔會覺得對唔住老婆?」老伯即說:「老婆我真係對你唔住!」吳官先要他提高聲量再說一遍,然後指「𠵱家唔係同我道歉」,叫他面向太太再三重複。太太聽到後哭得更厲害,並說原諒丈夫,吳官則說:「你都幾大方,幾豁達,唔係好多老婆講得出原諒佢㗎。」

吳官最後充當「和事老」,叫夫妻二人「從此以後擺低件事,唔准再提,無論嗌幾多次交,唔准提」,又勸太太「唔好再有心病,相信你做得到」,太太「唔」一聲答應後,便與丈夫及女兒離開法庭。


被告熊國超(左)昨認罪,其女兒(中)和太太(右)均到庭支持他


7. 「天才」伯狎智障女子案:

吳蕙芳斥:「下流賤格,你試吓自己老婆同女畀人咁非禮,你揼死嗰個人添呀!」

有妻子兒女的74歲退休漢李天才,在公園遇上一名有唐氏綜合症兼中度智障的37歲女子後,用一瓶可樂作餌,繼而捏胸及伸手入女方褲內肆意非禮,事件被其他街坊目擊而揭發。


8. 屢犯非禮富家子鍾雋弘囚7星期:

吳蕙芳斥被告:「做一個似人嘅人,唔好我困住你時就後悔知錯,放出嚟時就咩都唔記得」

原來鍾雋弘對上一次係佢審,第七次終於比吳官拉去坐監


9. 26歲少婦誣告小巴司機非禮:

吳蕙芳斥:「唔係你精神有問題,就係心地非常唔好。」

裁判官了解案情後直言:「唔係你精神有問題,就係心地非常唔好。」

官斥責被告為了一場爭執,而想令對方坐監,「可能人哋一生人從未犯過事,就因為你黑心、誣告人哋而妻離子散、無咗份工,人生從此不一樣、鬱鬱不得志……」官又反問被告:「人哋為咗咁而坐監,你個心好涼啦?」


10. 吳蕙芳教控方寫粗口字:

在控方讀案情期間,主任裁判官吳蕙芳發現被告向兩名事主所發送的「粗口短訊」中,其中兩句「你老母×」被寫成「你老母西」,質疑「寫少咗個門字」,可能令句子意思完全不同,控方聽取裁判官意見後即時更正。


11. 內地躁妻斬港夫案:

吳蕙芳斥:「你唔再愛佢唔緊要,你唔好蝦佢,起碼佢畀你嚟到香港,搵到更好嘅未來,妳唔愛佢可以申請離婚,唔好做成家庭悲劇呀!」

吳官直言:「好多中港兩地及香港婚姻嘅悲劇!」指被告當年是睜著眼睛,嫁給比她年紀大十八年的丈夫,「大家年輕力壯,你冇嫌棄佢……唔係話你o依家嫌棄佢!」強調不論是否中港婚姻,夫婦之間的相處也是一門學問。

主任裁判官吳蕙芳聞言不禁謂:「一把生果刀,一把菜刀喎﹗」她形容案情非常嚴重:「唔知點解你老公肯畀你簽保!」


12. 火爆破產青年在今年七月於粉嶺太平洋酒吧「爆樽」傷人案:

吳蕙芳痛斥青年:「別人慶祝生日,你就慶祝死忌」

郭於2005年被頒破產令,吳官寄語被告:「廿一歲就申請破產,希望阿仔你生性」

吳官寄語被告:「喺邊度跌倒,就要喺邊度自己起返身!」


13. 投資移民內地漢 酒店襲擊保安:

吳蕙芳斥被告: 「先生,你不是國內派來香港移民的吧?你是國家批准移居香港的。你囂張跋扈,有辱國家對你的寄望,丢臉嗎?」然後續說:「你是投資移民的,不要財大氣粗。你還有三個孩子在美國,如果同樣行為在酒店生事,那邊的保安警察可沒有那麼容易相處;他們有槍,不是趕,是用槍口對著你,萬一走火,就會有悲劇發生。」

吳官寄語:「既然你是香港居民,應該好好提高自己的修養。你現在是香港人,我們非常歡迎,但不要將香港人面子丢光。」

吳官再次警告被告:「你已有下一代,要以身作則,否則下一代沒有希望。」


14. 七旬婦不滿管理處經理態度一天內瘋狂致電843次 

吳蕙芳訓斥:「妳係咪有問題呀?精神有冇病呀?打八百幾次電話畀人?咁無聊嘅妳,妳再做呢啲嘢,我一定捉妳去睇吓係咪傻嘅!」

71歲被告劉盧笑聽罷吳官訓斥後,大聲回應謂:「可以!」吳官立即反問:「可以乜嘢?」被告答:「唔再做啲咁cheap嘅嘢囉。」吳官遂指:「Cheap唔cheap都唔可以做啲無聊嘅嘢。」吳官並下令將被告用作犯案的固網電話沒收。


15. 兩內地男追星用假證潛入金像獎會場

吳蕙芳以普通話提醒被告:「你以後最好跟我老老實實的做人。你不老老實實做人,你的下一代一定也不是老實的人。出甚麼差錯,也不是其他人的因素。」,作為女兒的好榜樣,又訓斥兩被告「上樑不正下樑歪」!