香港第二任特首曾蔭權今日以「從信仰角度分享牢中的感受和反省」為題,在明愛大廈禮堂舉行2小時的天主教分享會。

曾蔭權回首出任特首時,因對自己的判斷越來越有信心,故下判斷前,未有先思考耶穌的想法,形容「成就快感好短暫,好易上癮,每次我都覺得唔完美,會令人短暫頭腦發熱,但內心無持續平安,因為呢個唔係同上主對話得出的成果」。他自稱當時「剛愎自用」,所作的決定未必是天主認為最好,故得不到天主的安慰和恩賜,透露獄中反思被囚是否「禍中尋福」,終體會今次被囚時的孤獨不是痛苦而是恩典,「係天主先會明瞭嘅大恩典」。

他又指,不相信自己被判入獄,是法庭和執法人員可控制,「最後控制都係天主,背後都有原因,原因我唔清楚,或者我親眼見到佢(天主)時,我會問佢,我唔會擔心」,強調要全心愛人,「包括侵犯我、陷害我嘅人」。他並指,從獄中的護士、清潔工人、懲教署監督身上,都見到天主的影像,「我以前成日同同事講要信香港人,我而家更加要講要愛香港人」,說畢後獲全場掌聲長達一分鐘和應。

曾蔭權被問到為何強調「愛香港人」時說,自己在香港土生土長,「人哋話(香港)嗰度又嘈、又人多、又空氣污染,點解咁鍾意?我就係鍾意呢個地方」。未有直接評論時政的他又若有所指:「香港人好真誠,佢哋好易發火,但亦好明道理,我自己的確覺得香港係好可愛,但你要明白唔係個個人鍾意你,我成日講,我嗰時做特首,任何政策若得到6成半、7成支持,已好架勢可以推行,但你要知道有3成人唔滿意時,嗰班人會點呢?3成人唔係少喎,200幾萬人個喎嗰度!」說畢台下觀眾一陣笑聲。

他強調從政者「唔使個個香港人愛你」,但要愛你的敵人;當主持人問及目前香港「好似病咗」,如何化解?曾即說:「我哋今日係宗教嘅交流」,再次惹來全場笑聲。

他接着指,大家若相信耶穌,香港一定是福地,因為有天主愛護香港,「唔需要擔心,(香港)一定會變好……我哋梗要經過一啲過程,但最重要係你有信心,亦都唔好要求太高,one day at a time,今日開心、聽日再開心啲,千祈唔好太緊張其他啲嘢。」

影片: 

Loading...